ធ្វើយ៉ាងណាទើបសន្សំប្រាក់គ្រប់សម្រាប់ដើរលេង?

ធ្វើយ៉ាងណាទើបសន្សំប្រាក់គ្រប់សម្រាប់ដើរលេង?

ដូចពាក្យចាស់បុរាណខ្មែរពោលថា ធ្វើអ្វីធ្វើឲហើយទាន់ខ្លួននៅក្មេង អាស្រយ័ហេតុនេះហើយអ្នកគួរតែដើរឲបានច្រើន សន្សំបទពិសោធន៍ សាកល្បងអ្វីដែលថ្មីតាមកន្លែងផ្សេងៗ មិនថាក្នុងស្រុកឬក្រៅស្រុក។ យ៉ាងណាមិញអ្វីដែលជាឧបសគ្គចម្បងនោះគឺ ថវិការ កាលណាថវិការមិនគ្រប់ឱកាសក៏មិនអំណោយផលដែរ។ ធ្វើយ៉ាងណាទើបអាចសន្សំប្រាក់បានគ្រប់សម្រាប់ដើរលេង ខាងក្រោមនេះជាតិចនិកខ្លះដែលជួយអ្នកបាន៖

 

១ បង្កើតគណនីសន្សំសម្រាប់ដំណើរកម្សាន្ដពេលវិសម្សកាល

បង្កើតគណនីដាច់ដោយឡែក ជារៀងរាល់ខែអ្នកអាចលួចរិះថាំ ដកប្រាក់ខ្លះពីប្រាក់ខែទាំងអស់ ម្ដង ២០ ឬ ៣០ដុល្លារដាក់ក្នុងកុងមួយខែម្ដង យ៉ាងហោចណាស់ក៏បាន ៣៦០ដុល្លារជាងដែរក្នុងមួយឆ្នាំបើគិតទាំងការប្រាក់ គ្រប់គ្រាន់សម្រាប់ថ្លៃធ្វើដំណើរទៅកាន់ខេត្តនានា ឬប្រទេសជិតខាងបានយ៉ាងងាយ។

 

២ កាត់បន្ថយការចាយវាយ

ធម្មតាទេយុវជនខ្មែរភាគច្រើនចូលចិត្តជួបជុំមិត្តភក្តិនៅតាមហាងកាហ្វេប្រ៊េនៗ ញាុំអាហារក្រៅផ្ទះ មើលកុន ទិញឥវ៉ាន់ជាដើម ដែលសុទ្ធសឹងតែជាចំណាយដែលមិនសូវចាំបាច់។ អាស្រយ័ហេតុនេះហើយ បើសិនជាដាក់គោលដៅហើយអ្នកត្រូវលះបង់ខ្លះសម្រាប់គោលដៅមួយទៀត។

 

៣ រកចំណូលបន្ថែម

បើសិនជាប្រាក់ខែនៅស្ទើរ ហើយកន្លែងដែលអ្នកប្រាថ្នាទាមទារឲមានការចំណាយច្រើន នោះអ្នកត្រូវគិតគូររកចំណូលបន្ថែមហើយ។ អ្នកអាចធ្វើការក្រៅម៉ោងតាមហាងកាហ្វេ ហាងលក់ខោអាវ ឬធ្វើជាអ្នកបកប្រែភាសា។ ជម្រើសម៉្យាងទៀត អ្នកអាចលក់របស់របរចាស់ៗ ដូចជាខោអាវ ឬសៀវភៅមួយទឹកក្នុងតម្លៃសមរម្យ យ៉ាងហោចណាស់ក៏បានក្រែលគ្រាន់ដាក់កុងដែរ។

 

ហេតុអ្វីត្រូវចាំបាច់បង្កើតមូលនិធិសម្រាប់អាសន្ន?

ហេតុអ្វីត្រូវចាំបាច់បង្កើតមូលនិធិសម្រាប់អាសន្ន?

ក្នុងឆាកជីវិតមនុស្សម្នាក់ៗ មើលមិនឃើញ ទាយមិនត្រូវនោះទេ។ ថ្ងៃនេះសប្បាយចិត្ត ថ្ងៃស្អែកអាចនឹងមានទុក្ខ មានរឿងកើតឡើងដែលមិនបានព្រៀងទុកជាច្រើន។

ដូចនេះហើយទើបអ្នកចាំបាច់ត្រូវមានមូលិនិធិសម្រាប់ពេលអាសន្ន គ្រាន់ជួយដោះទាល់ពេលត្រូវការ។

 

អ្វីទៅជាមូលនិធិសម្រាប់អាសន្ន?

វាគឺជាប្រាក់ឬគណនីដែលបង្កើតឡើង ដើម្បីតម្កល់ទុកសាច់ប្រាក់មួយចំនួនធំសម្រាប់ប្រើប្រាស់ពេលមានអាសន្ន ឬការចំណាយណាមួយដែលមិនបានព្រៀងទុកដូចជា សម្រាប់ពេលឈឺសង្គ្រោះបន្ទាន់ ជួសជុលផ្ទះ ជួលជុលឡាន ជាដើម។

 

ហេតុអ្វីចាំបាច់មានមូលនិធិសម្រាប់អាសន្ន?

ចម្លើយគឺ ដើម្បីចៀសវាងការខ្ចីប្រាក់ពីធនាគារឬអ្នកដទៃ។ ការដែលមានលុយសម្រាប់សង្គួរខ្លួនឯងជាការល្អ ពីព្រោះពេលដែលយើងមានបញ្ហា ប្រាកដជាមានមនុស្សមិនច្រើនទេដែលទុកចិត្ត និងឲប្រាក់ខ្ចី។ អាស្រយ័ហេតុនេះហើយ ពាក្យចាស់ខ្មែរពោលថាខ្លួនទីពឹងខ្លួន។

 

តើគួរសន្សំប្រាក់ប៉ុន្មាន?

មូលនិធិសម្រាប់អាសន្នខុសពី ការសន្សំធម្មតាទូទៅ អ្នកចាំបាច់ត្រូវមានប្រាក់មួយចំនួនធំសម្រាប់តម្កល់ទុក។ ជាការល្អអ្នកគួរដកប្រាក់ខែឬប្រាក់បៀវត្សន៍ចំនួន ៣ ទៅ ៦ខែនៃចំនួនដែលអ្នកទទួលបានក្នុងមួយឆ្នាំ យោងទៅតាមលទ្ធភាព។

៤ជំហានក្នុងការសន្សំប្រាក់

៤ ជំហានក្នុងការសន្សំប្រាក់

សម្រាប់យុវជនខ្មែរការសន្សំប្រាក់ឲមានប្រសិទ្ធភាពប្រហែលជាមានការលំបាកខ្លាំង ព្រោះពិបាកហាមចិត្តមានៈខ្លួនឯងពីការចំណាយ។ ខាងក្រោមនេះជាជំហានងាយៗដែលអ្នកគួរអនុវត្តតាម៖

 

១ តាមដានការចំណាយរបស់អ្នក

បើអ្នកមិនដឹងពីការចំណាយរបស់ទេ នោះអ្នកក៏មិនងាយភ្ញាក់ខ្លួនដែរ។ តាមដានឲច្បាស់លាស់នូវការចំណាយជាប្រចាំ រាប់តាំងពីលុយមើលកុន ទិញអាហារខាងក្រៅ ចាក់សាំង ទិញខោអាវ ជាដើម។ ពេលដែលដឹងឮពីថ្លៃចំណាយសរុបហើយ នោះអ្នកអាចចាប់ផ្ដើមកាត់បន្ថយអ្វីដែលមិនចាំបាច់ចោលខ្លះ។

 

២ ជ្រើសរើសអ្វីដែលអ្នកចង់បាន

ជាធម្មតានៅពេលដែលចង់បានអ្វីម្យ៉ាងហើយ មិនថាគេមិនថាយើងទេ បើលុយមិនគ្រប់ក៏ត្រូវសន្សំ អត់ឃ្លានទាល់តែគ្រប់ដែរ។ នេះហើយជាកម្លាំងចិត្តម្យ៉ាងសម្រាប់ជម្រុញអ្នកឲសន្សំប្រាក។ អ្នកអាចសន្សំសម្រាប់រយៈពេលខ្លីដូចជា ឡាន ម៉ូតូ គ្រឿងអលង្ការ ទូរសព្ទ័ កុំព្យូទរ័ ដោយឡែករយៈពេលវែងមានដូចជា ផ្ទះ ថ្លៃមន្ទីរពេទ្យ ឬ មូលនិធិសម្រាប់អាសន្នជាដើម។

 

៣ រៀនអត់ធ្មត់និងចេះកំណត់អាទិភាព

ចៀសមិនផុតទេពីការចាយវាយប្រចាំថ្ងៃ តែបើអ្នកចាយមិនដឹងមុខក្រោយនោះប៉ុន្មានក៏មិនសល់ដែរ ប្រាកដជាចាយសល់ថ្ងៃ។ ដូចនេះហើយយុវជនខ្មែរគួរចេះអត់ធ្មត់ខ្លះពីការចាយវាយលើអ្វីដែលមិនចាំបាច់ និងបែងចែកអាទិភាពមុនក្រោយពីអ្វីដែលចាំបាច់ត្រូវចំនាយ។

 

៤ បង្កើតគម្រោងថវិការ

ទោះបីអ្នកមានភាពច្បាស់លាស់ក្នុងការសន្សំក៏ដោយ ក៏អ្នកគួរបង្កើតគម្រោងថវិការមួយផ្ទាល់ខ្លួនសម្រាប់ កំណត់ចំនួនប្រាក់ដែលត្រូវសន្សំ ប្រាក់ដែលគួរដក ប្រាក់សម្រាប់ការចាយវាយផ្សេងៗជាដើម។

ច្បាប់កំពូលទាំង៣សម្រាប់សហគ្រិនជំនាន់ថ្មី

ច្បាប់កំពូលទាំង៣សម្រាប់សហគ្រិនជំនាន់ថ្មី

សហគ្រិនខ្មែរជាច្រើនប្រាកដជាធ្លាប់ឆ្លងកាត់និងជួបប្រទះការលំបាកក្នុងការវិនិយោគប្រាក់ឲមានប្រសិទ្ធភាពនិងមានផ្លែផ្កា ស្របគ្នានេះដែរការថ្លឹងថ្លែងហិរញ្ញវត្ថុផ្ទាល់ខ្លួននិងការរក្សាស្ថេរភាពជំនួញរបស់ដោយឯករាជ្យប្រាកដជាមានការលំបាកច្រើន។ ថ្ងៃនេះស្ពាននឹងលើកឡើងពីច្បាប់ទាំងបីក្នុងការរៀបចំហិរញ្ញវត្ថុផ្ទាល់ខ្លួនឲមានប្រសិទ្ធភាពសម្រាប់សហគ្រិនជំនាន់ថ្មី៖

 

១ ផ្ដល់ប្រាក់ខែឲខ្លួនឯង

ជាការពិតណាស់ទោះបីអ្នកជាម្ចាស់ក្រុមហ៊ុនឬថៅកែសហគ្រាសណាមួយក៏ដោយ ក៏អ្នកចាំបាច់ត្រូវខ្វល់ខ្វាយពីសុខទុក្ខនិងសុវត្ថិភាពហិរញ្ញវត្ថុផ្ទាល់ខ្លួនរបស់អ្នកដែរ។ នៅពេលដែលអ្នកក្រុមហ៊ុនរបស់អ្នកមានលំនឹង និងរកបានចំណូលសម្រាប់ទប់ទល់ការចាយវាយនានា និងប្រាក់ខែបុគ្គលិកហើយ អ្នកគួរពិចារណាដកទុកមួយចំណែកសម្រាប់ជាប្រាក់បៀវត្សន៍ប្រចាំខែផ្ទាល់ខ្លួននិងប្រាក់សន្សំសម្រាប់ពេលចូលនិវត្តន៍។

 

២ បែងចែកឲដាច់នូវប្រាក់ផ្ទាល់ខ្លួននិងប្រាក់សម្រាប់វិនិយោគ

ជាទូទៅ សហគ្រិនខ្មែររមែងបែងចែកមិនដាច់រវាងប្រាក់ផ្ទាល់ខ្លូននិងសម្រាប់ជំនួញ។ ពេលខ្លះពួកគាត់យកប្រាក់ផ្ទាល់ខ្លួនទៅវិនិយោគក្នុងមុខជំនួញ ស្របគ្នានេះដែរពេលខ្លះពួកគេយកប្រាក់សម្រាប់ជំនួញមកបំពេញតម្រូវការចាយវាយផ្ទាល់ខ្លួន។ ការធ្វើបែបនេះគឺខុសហើយថែមទាំងអាចប៉ះពាល់អនាគតរបស់អាជីវកម្មផងដែរ។ ជាការល្អពួកគាត់គួរ បង្កើតគណនីពីរផ្សេងគ្នា មួយសម្រាប់អាជីវកម្ម និងមួយទៀតសម្រាប់ការចាយវាយផ្ទាល់ខ្លួន។

 

៣ ការយកឈ្នះបំណុល

ពេលខ្លះបន្ទាប់ពីបញ្ចប់មហាវិទ្យាលយ័ យុវជនមួយចំនួនអាចនឹងមិនទាន់ដកខ្លួនរួចពីបំណុលឬប្រាក់កម្ចីសម្រាប់ថ្នាក់ឧត្តមសិក្សារបស់ពួកគេ។ ហេតុដូចនេះហើយ ទើបយុវជនមួយចំនួនមានភាពស្ទាក់ស្ទើរក្នុងការបណ្ដាក់ទុនឬចាប់ផ្ដើមមុខជំនួញ។ យ៉ាងណាមិញ នេះមិនមែនជាបញ្ហាធំណាស់ណានោះទេ ដរាបណាអ្នកមានឆន្ទៈ គម្រោងផែនការ ការសន្សំនិងបញ្ជីថវិការឲច្បាស់លាស់ នោះមុខជំនួញរបស់អ្នកនឹងមានការរីកចម្រើន ស្របពេលនេះអ្នកក៏អាចយកប្រាក់នោះទៅរំលោះបំណុលចាស់។x

គន្លឹះរៀបចំហិរញ្ញវត្ថុទាំង ៣ចំណុច សម្រាប់សហគ្រិនក្មេងខ្ចីទាំងឡាយ

គន្លឹះរៀបចំហិរញ្ញវត្ថុទាំង ៣ចំណុច សម្រាប់សហគ្រិនក្មេងខ្ចីទាំងឡាយ

សម្រាប់សហគ្រិនវយ័ក្មេងទាំងឡាយនៅកម្ពុជា វាប្រាកដជាមានការលំបាកក្នុងរៀបចំទុកដាក់ ចាយវាយ និងសន្សំដើម្បីធ្វើឲហរិញ្ញវត្ថុដែលមាននៅក្នុងដៃមានប្រសិទ្ធភាពនិងស្ថេរភាពសម្រាប់មុខជំនួញរបស់អ្នក។ ខាងក្រោមនេះជាដំបូន្មានខ្លះៗដែលអ្នកពុំគួរមើលរំលង៖

 

១ ពិនិត្យមើលឥណទានរបស់អ្នក

ប្រជាជនខ្មែរភាគច្រើនមិនសូវចាប់អារម្មណ៌ពីពិន្ទុឥណទានរបស់ពួកគេឡើយ។ អាស្រយ័ហេតុនេះ ប្រសិនបើអ្នកស្ថិតនៅក្នុងជំពូកក្រុមនេះ អ្នកចាំបាច់ត្រូវស្ទុះស្ទា ខ្វាត់ខ្វែងស្នើសុំរបាយការណ៍ឥណទានពីធនាគារដោយឥតគិតថ្លៃ។ ព្រោះថានៅពេលដែលអ្នកដឹងអំពីពិន្ទុនិងស្ថានភាពរបស់អ្នកហើយវាបង្កភាពងាយស្រួលសម្រាប់អ្នកក្នុងការសន្សំពិន្ទុបន្ថែមដើម្បីជាប្រយោជន៍ដល់មុខជំនួញរបស់អ្នក និងការគ្រប់គ្រងហិរញ្ញវត្ថុ។

 

២ សន្សំសំចៃតាមដែលអាចទៅរួច

វាប្រហែលជាពិបាកបន្ដិចនៅពេលតំបូងក្នុងការកាត់បន្ថយការចាយវាយរបស់អ្នកប្រចាំថ្ងៃ ដើម្បីសន្សំលុយខ្លះក្នុងការវិនិយោគជំនួញរបស់អ្នក។ អ្នកមិនចាំបាច់កាត់បន្ថយចំណាយទាំងស្រុងនោះទេ សន្សំក្បាលកាក់ក៏អាចជួយសម្រួលអ្នកខ្លះដែរ។ ឧទាហរណ៍៖ បើអ្នកចូលចិត្តញាំុកាហ្វេប្រ៊េនមួយកែវ ៥ដុល្លារ នោះអ្នកគប្បីកាត់បន្ថយមកញាុំកាហ្វេឆុងខ្លួនឯងនៅផ្ទះវិញ។

 

៣ ស្វែងរកអ្នកផ្ដល់ដំបូន្មានផ្ទាល់ខ្លួន

សម្រាប់ចំណុចនេះប្រហែលជាមិនសូវនិយមក្នុងស្រទាប់ប្រជាជនខ្មែរនោះទេ ប៉ុន្ដែការដែលមានមនុស្សម្នាក់ដែលមានបទពិសោធន៍ក្នុងការផ្ដល់ដំបូន្មានដល់អ្នកជាការល្អសម្រាប់សហគ្រិនថ្មីថ្មោង។ អ្នកទាំងនោះអាចជួយឲអ្នករីកចម្រើន និងផ្ដល់មេរៀនជីវិតនានាដល់អ្នក សម្រាប់ការធ្វើជំនួញ។